Жазылуларды Android-тан iPhone-ға көшіру

Android пен iPhone нұсқаларын байланыстыратын ортақ аккаунт жоқ, сондықтан жазылулар бір файлмен көшеді: оны Android телефонда экспорттайсыз, өзіңізге жібересіз де, iPhone-да импорттайсыз. Бәріне шамамен он минут кетеді. iPhone-да нәтижені тексеріп болмайынша, Android телефонды қолыңыздан шығармаңыз.

Бастамас бұрын Android телефондағы My Clients қосымшасын Google Play арқылы жаңартыңыз, ал iPhone-ға оны App Store-дан орнатыңыз.

1-қадам. Android телефонда жазылуларды экспорттаңыз

1. My Clients қосымшасын ашып, Баптаулар бөліміне өтіңіз — тісті дөңгелек белгісі, соңғы қойынды.
2. Жад бөлімінде Деректер және сақтау, содан кейін CSV деректерін экспорттау дегенді түртіңіз.
3. Экспорттау түймесін түртіңіз. Файлға барлық жазылу кіреді — күн аралығын таңдаудың керегі жоқ, — ал қосымша олардың санын көрсетеді: «… жазылу экспортқа дайын». Осы санды есте сақтаңыз.
4. Бөлісу түймесін түртіп, файлды өзіңізге жіберіңіз: электрондық хатпен, Telegram-дағы өзіңізге арналған чатқа немесе WhatsApp-тағы өзіңізбен чатқа. Ал Сақтау файлды өзіңіз таңдаған қалтаға, мысалы, Google Drive-қа салады.

2-қадам. Файлды iPhone-дағы Файлдар қосымшасына сақтаңыз

iPhone-дағы My Clients файлды Файлдар қосымшасынан алады, сондықтан ол алдымен сонда тұруы керек:

• Поштадан: тіркемені түртіңіз, бөлісу түймесін басып, файлды Файлдарға сақтауды таңдаңыз.
• Telegram не WhatsApp-тан: файлды ашып, бөлісу түймесін басыңыз да, Файлдарға сақтауды таңдаңыз.
• Google Drive-тан: iPhone-да Drive қосымшасы болса, Drive Файлдардың ішінде жеке орын болып көрінеді — ештеңе сақтаудың қажеті жоқ.

iCloud Drive не телефонның өз жады — кез келген қалта жарайды.

3-қадам. iPhone-да файлды импорттаңыз

1. My Clients қосымшасын ашып, Параметрлер бөліміне өтіңіз — соңғы қойынды.
2. Деректер және синхрондау, содан кейін Деректерді импорттау дегенді түртіңіз.
3. Android немесе басқа қолданбадан бөлімінде CSV-дан импорттау дегенді түртіңіз. (Одан жоғарыдағы Сақтық көшірмеден қалпына келтіру басқа iPhone-нан келген көшірмеге арналған.)
4. Стратегия бірден Қайталанулардан өту күйінде тұрады — солай қалдырыңыз. Жаңа iPhone-да ол жай ғана бәрін қосады.
5. CSV файлын таңдау түймесін түртіп, файлды Файлдардың ішінен табыңыз.
6. Импорт аяқталды деген жазудың астында қанша жол импортталғаны көрсетіледі. Сан 1-қадамдағымен бірдей болса, бәрі көшті деген сөз. Дайын түймесін түртіңіз.

iPhone қосымшаға хабарландыру жіберуге рұқсат бересіз бе деп сұрағанда, рұқсат беріңіз — әр жазылудың алдындағы еске салу сізге осылай келеді.

4-қадам. iPhone-ды баптап алыңыз

1. Еске салуларды тексеріңіз — Параметрлер → Хабарландырулар: Хабарландыруларды қосу қосулы тұрсын, ал Хабарландыру уақыты жазылудан қанша бұрын хабар келетінін білдіреді. Android-тағы баптау бұл жерге көшпейді.
2. Валютаны таңдаңыз — Параметрлер → Тіл және аймақ → Валюта. Бағалар жай сан болып келеді.
3. Сақтық көшірмені қосыңыз — Параметрлер → Деректер және синхрондау → Сақтық көшірме → Автоматты сақтық көшірмені қосу. Көшірмелер iCloud Drive-ыңызға түседі, сондықтан телефон жоғалса да, клиенттер базасы онымен бірге кетпейді. Деректердің сақтық көшірмесін жасау және қалпына келтіру бетін қараңыз.

Не көшеді, не көшпейді

Өткен және алдағы жазылулардың бәрі клиенттің атымен, күні мен уақытымен, қызметімен, ұзақтығымен, бағасымен, алдын ала төлемімен, шайлығымен, телефон нөмірімен және жазбаларымен бірге көшеді. Instagram не Telegram сілтемесі ретінде сақталған клиент сілтеме күйінде қалады, сондықтан Клиентке хабарлау да, профильді ашатын жылдам әрекет те бұрынғыша жұмыс істейді. Бұрын көрсеткен қызметтеріңіз жазылу формасында бірден ұсыныс болып шығады.

Android телефонда қалатындар:

• Шығындар, басқа кіріс және демалыс күндері. Файлда тек жазылулар бар, сондықтан керегін ауыспас бұрын жазып алыңыз.
• Баптаулар: тіл, тақырып, еске салу мәтіні және Менің қызметтерім тізімі — оларды iPhone-да қайта орнатасыз.
• Файлдан кейін қосылған жазылулар. Android-тағы сақтық көшірме де iPhone-да импортталады — бұл сол CSV, — бірақ ол бес күн бұрынғы болуы мүмкін; ал 1-қадамдағы экспорт соңғы минутқа дейінгісін қамтиды.

iPhone-дағы Pro

Pro сізбен бірге көшпейді. Google Play мен App Store оны бөлек сатады, ал қосымшада екеуін байланыстыратын аккаунт жоқ. iPhone-да Клиенттер тізімі тегін; Pro кез келген кезеңнің статистикасын, шығындарды, виджеттерді, iPad-пен iCloud арқылы синхрондауды және тағы басқасын қосады. Pro-ға не кіреді бетін қараңыз.

Android-та Pro алған болсаңыз және ол телефон енді керек болмаса, жазылым өздігінен ұзармауы үшін Google Play-де одан бас тартыңыз: Google Play → профиль суретіңіз → Төлемдер және жазылымдар → Жазылымдар.

Файл импортталмаса

• «Қажетті бағандар жоқ» — бұл 1-қадамдағы экспорт файлы емес, не ол жолда өзгерген. Қайта экспорттап, файлды ешқандай өзгеріссіз жіберіңіз.
• «Файлды оқу мүмкін болмады» — шешімі сол: жаңадан экспорттау.
• Бәрі екі рет қосылып кетті — файл Барлығын қосу стратегиясымен екі рет импортталған. Оны Алмастыру стратегиясымен тағы бір рет импорттаңыз: ол iPhone-дағы жазылуларды жойып, файлды қайта жүктейді.

Сонда да шықпаса, бізге жазыңыз да, файлды тіркеп жіберіңіз — жазылуларды жүктеуге көмектесеміз.